Cwestiynau Cyffredin
C: Does neb yn fy nharo. Sut all hyn fod yn drais domestig?
A: Nid yw trais domestig wastad yn gorfforol, ac mae hynny’n golygu nad yw’r arwyddion yn amlwg ar bob adeg. Gall trais gynnwys rheoli cyswllt rhywun gyda ffrindiau a theulu (eu hynysu), dinistrio eiddo, bygythiadau geiriol preifat neu gyhoeddus, ac ati.
C: A oes y fath beth a thrais domestig o ran pobl lesbiaidd, hoyw, deurywiol a thrawsrywiol?
A: Derbyniodd ein llinell gymorth ar drais domestig i bobl lesbiaidd, hoyw, deurywiol a thrawsrywiol 800 o alwadau rhwng Ionawr ac Ebrill 2008. Fe siaradom am dros 35 awr â galwyr lesbiaidd, hoyw, deurywiol a thrawsrywiol am drais domestig, cyfeirio, gwrando gweithredol, cynllunio diogelwch ac atgyfeirio neu ddarparu gwybodaeth.
Dengys arolygon bod o leiaf 1 o bob 4 o bobl lesbiaidd, hoyw, deurywiol a thrawsrywiol yn profi trais domestig. Mae trais domestig yn bodoli ar gyfer pobl lesbiaidd, hoyw, deurywiol a thrawsrywiol. Mae’n real.
C: Pan fydd dwy fenyw yn ymladd, onid ffrae fach rhwng cariadon yw hyn?
A: Does dim byd didaro am drais mewn perthynas, ac mae cyfeirio ato fel hyn yn lleihau ei effaith ac yn rheswm pam fod trais domestig ymysg pobl lesbiaidd, hoyw, deurywiol a thrawsrywiol yn dal i fod yn broblem gudd.
C: Pan fydd dau ddyn yn ymladd, onid gemau rhyw tebyg i S&M yw hyn?
A: Arfer rhywiol yw sadomasocstiaeth. Mae trais domestig yn ymosodol ac un ochrog ac nid oes unrhyw fath o ganiatâd. Nid yw chwarae rôl rhywiol yr un peth â thrais domestig.
C: Onid yw trais domestig lesbiaidd, hoyw, deurywiol a thrawsrywiol yr un peth a thrais domestig heterorywiol?
A: Mewn ffordd ydi, ond mae yna ambell wahaniaeth pwysig iawn. Un prif bwynt yw’r diffyg gwasanaethau cefnogaeth sydd ar gael i ddioddefwyr trais domestig lesbiaidd, hoyw, deurywiol a thrawsrywiol. Un arall yw gorfod dod allan er mwyn adrodd y trais domestig. Ar ben hynny, mae’r gwasanaethau rydym angen i’n cefnogi yn aml yn creu problemau trwy ddosbarthu trais domestig fel ymosodiad cyffredin, neu gamgymryd/peidio gallu adnabod y troseddwr. Golyga hyn fod gan bobl lesbiaidd, hoyw, deurywiol a thrawsrywiol broblemau ychwanegol wrth chwilio am gymorth.
C: Sut all fod yn drais domestig os yw’r un llai yn taro’r un mwy?
A: Ni adlewyrchir maint na thaldra yn ymddygiad ymosodol rhywun. Nid yw’r ffaith fod rhywun yn llai yn golygu na allant eich taro, dinistrio’ch eiddo, bygwth eich allanu i’ch ffrindiau a theulu, rheoli eich cyllid neu’ch bychanu o flaen eraill.
C: Beth yw’r fantais o’ch ffonio chi am gymorth yn hytrach na llinell gymorth gyffredin?
A: Mae pobl lesbiaidd, hoyw, deurywiol a thrawsrywiol yn deall yn reddfol y materion a phroblemau y bydd unigolion lesbiaidd, hoyw, deurywiol a thrawsrywiol eraill yn wynebu. Ni fydd ein gweithwyr sesiynol yn eich beirniadu oherwydd eich rhywioldeb; maent yn delio â’r rhai sy’n dioddefo o drais domestig a’r rhai sy’n ei achosi.
